ಕಾಂತಾರ” ಸಿನಿಮಾವನ್ನು ಸಿನಿಮಾ ರೀತಿಯಲ್ಲೇ ನೋಡಿ – ದೈವ ನಿಂದನೆ ಮಾಡಬೇಡಿ!*

*“ಕಾಂತಾರ” ಸಿನಿಮಾವನ್ನು ಸಿನಿಮಾ ರೀತಿಯಲ್ಲೇ ನೋಡಿ – ದೈವ ನಿಂದನೆ ಮಾಡಬೇಡಿ!*

*KODAGU NEWS*

ಮಂಗಳೂರು –
ಕರಾವಳಿ ಭಾಗದ ಸಾವಿರಾರು ವರ್ಷಗಳ ಇತಿಹಾಸ ಹೊಂದಿರುವ ದೈವ ಆರಾಧನೆಯು ನಮ್ಮ ಸಂಸ್ಕೃತಿ, ನಂಬಿಕೆ ಮತ್ತು ಪರಂಪರೆಯ ಮೂಲಾಧಾರವಾಗಿದೆ. *“ಕಾಂತಾರ”* ಸಿನಿಮಾ ಮೂಲಕ ತುಳುನಾಡಿನ ದೈವ ಆರಾಧನೆ ಜಗತ್ತಿಗೆ ಪರಿಚಿತವಾಗಿದೆ ಎಂಬುದು ಸತ್ಯವಾದರೂ, ಕೆಲವರು ಸಿನಿಮಾದ ಹಿನ್ನಲೆಯಲ್ಲಿ ದೈವವನ್ನು ನಿಂದಿಸುವ, ಅಪಮಾನ ಮಾಡುವ ರೀತಿಯಲ್ಲಿ ವರ್ತಿಸುತ್ತಿರುವುದು ಗಂಭೀರವಾಗಿ ಖಂಡನೀಯ ಎಂದು ದೈವ ಆರಾಧಕರು ಮತ್ತು ದೈವ ನರ್ತಕರ ಸಂಘ ಸ್ಪಷ್ಟಪಡಿಸಿದೆ.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಯ ನಿಕಟಪೂರ್ವ ಸದಸ್ಯ ಹಾಗೂ ದೈವ ಆರಾಧಕರು ಮತ್ತು ದೈವ ನರ್ತಕರ ಸಂಘದ ಸ್ಥಾಪಕ ಅಧ್ಯಕ್ಷ ಪಿ. ಎಂ. ರವಿ ಹಾಗೂ ಸಂಘದ ಅಧ್ಯಕ್ಷ ಸದಾಶಿವ ರೈ ಅವರು ಮಾಧ್ಯಮಗಳಿಗೆ ನೀಡಿದ ಹೇಳಿಕೆಯಲ್ಲಿ –
*“ಸಿನಿಮಾವನ್ನು ಸಿನಿಮಾ ರೀತಿಯಲ್ಲಿ ನೋಡಬೇಕು. ದೈವದ ನೃತ್ಯ ಅಥವಾ ದೈವ ಆರಾಧನೆಯನ್ನು ವ್ಯಂಗ್ಯವಾಗಿ, ಹಾಸ್ಯವಾಗಿ ಅಥವಾ ನಿಂದನಾತ್ಮಕವಾಗಿ ಪ್ರದರ್ಶಿಸುವುದು ನಮ್ಮ ಸಂಸ್ಕೃತಿಗೆ ಅವಮಾನ. ಇಂತಹ ನಡೆಗಳು ದೈವ ಆರಾಧಕರಿಗೆ ನೋವುಂಟುಮಾಡುತ್ತವೆ” ಎಂದು ಹೇಳಿದ್ದಾರೆ.*

*📍 ಸಾಮಾಜಿಕ ಜಾಲತಾಣದಲ್ಲಿಯೂ ಎಚ್ಚರಿಕೆ:*
ಕಾಂತಾರ ಚಾಪ್ಟರ್–1 ಬಿಡುಗಡೆ ಬಳಿಕ ಅನೇಕ ಥಿಯೇಟರ್‌ಗಳಲ್ಲಿ ದೈವ ಭಕ್ತರು ಆವೇಶಭರಿತರಾಗಿ ಪ್ರತಿಕ್ರಿಯಿಸಿದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದ್ದರೂ, ಅದನ್ನೇ ನೆಪ ಮಾಡಿಕೊಂಡು ಕೆಲ ಕಿಡಿಗೇಡಿಗಳು ಫೇಸ್ಬುಕ್‌, ಇನ್‌ಸ್ಟಾಗ್ರಾಮ್‌ ಸೇರಿದಂತೆ ಸಾಮಾಜಿಕ ಜಾಲತಾಣದಲ್ಲಿ ದೈವ ನಿಂದನೆ ಮಾಡುವ ಕಾಮೆಂಟ್‌ಗಳು, ವಿಡಿಯೋಗಳು ಹಾಕುತ್ತಿರುವುದು ವಿಷಾದನೀಯ ಎಂದು ಸಂಘದವರು ಹೇಳಿದ್ದಾರೆ.

*🎭 ಶಾಲಾ–ಕಾಲೇಜುಗಳಲ್ಲಿ ನೃತ್ಯ ಪ್ರದರ್ಶನ ಖಂಡನೆ:*

ಕಳೆದ ಬಾರಿಯೂ ಕಾಂತಾರ ಬಿಡುಗಡೆಯ ನಂತರ ಶಾಲಾ ವಾರ್ಷಿಕೋತ್ಸವ, ಪ್ರತಿಭಾ ಸ್ಪರ್ಧೆ, ಖಾಸಗಿ ಕಾರ್ಯಕ್ರಮಗಳಲ್ಲಿ “ದೈವ ನರ್ತನ” ನಾಟಕೀಯ ಪ್ರದರ್ಶನಗಳು ನಡೆದಿದ್ದವು. ಇವುಗಳು ಪವಿತ್ರ ದೈವ ನೃತ್ಯದ ಅಪಮಾನವಾಗಿದ್ದು, ಇಂತಹ ಕೃತ್ಯಗಳು ಪುನರಾವರ್ತನೆ ಆಗದಂತೆ ಎಚ್ಚರಿಸಿದ್ದಾರೆ.

*✋ ಸಂಘದ ಮನವಿ:*

“ದೈವವು ದೇವತೆಯಾದ್ದರಿಂದ ಅದನ್ನು ಹಗುರವಾಗಿ ಕಾಣಬೇಡಿ. ಅಪಹಾಸ್ಯ, ನಿಂದನೆ, ನಾಟಕೀಯ ಅಭಿನಯ ಅಥವಾ ವಿಡಿಯೋ ರೂಪದಲ್ಲಿ ಪ್ರದರ್ಶಿಸುವವರ ವಿರುದ್ಧ ಕಾನೂನು ಕ್ರಮದ ವಿಷಯವನ್ನು ಪರಿಗಣಿಸಲಾಗುತ್ತದೆ” ಎಂದು ಸಂಘದವರು ಎಚ್ಚರಿಸಿದ್ದಾರೆ.