ಕೊಡಗಿನ ರಸ್ತೆಗಳಲ್ಲಿ ಆತ್ಮವಿಶ್ವಾಸದಿಂದ ಸಾಗುತ್ತಿರುವ ಮಹಿಳಾ ಆಟೋ ಚಾಲಕಿಯರು
ಸುರೇಶ್ ಬಿಳಿಗೇರಿ.
ವಿರಾಜಪೇಟೆ:ಕೈಯಲ್ಲಿ ಸ್ಟೇರಿಂಗ್… ಕಣ್ಣಲ್ಲಿ ಆತ್ಮವಿಶ್ವಾಸ… ಮನಸ್ಸಿನಲ್ಲಿ ಬದುಕು ಕಟ್ಟಿಕೊಳ್ಳುವ ಛಲ…
ಇದು ಪುರುಷರಿಗಷ್ಟೇ ಸೀಮಿತ ಎನ್ನಲಾಗುತ್ತಿದ್ದ ಆಟೋ ಚಾಲನೆಯ ಕ್ಷೇತ್ರಕ್ಕೆ ಕೊಡಗಿನ ಮಹಿಳೆಯರೂ ಕಾಲಿಟ್ಟಿದ್ದಾರೆ. ತಮ್ಮ ದುಡಿಮೆಯಿಂದ ಕುಟುಂಬಕ್ಕೆ ಆಸರೆಯಾಗುವುದರ ಜೊತೆಗೆ, ಸ್ವಾಭಿಮಾನದಿಂದ ಬದುಕು ಕಟ್ಟಿಕೊಳ್ಳುತ್ತಿರುವ ಈ ಮಹಿಳೆಯರು ಇಂದು ಸಮಾಜಕ್ಕೆ ಹೊಸ ಸಂದೇಶವೊಂದನ್ನು ನೀಡುತ್ತಿದ್ದಾರೆ.
ವಿರಾಜಪೇಟೆ ನಗರದ ರಸ್ತೆಗಳಲ್ಲಿ ನಿತ್ಯ ಆಟೋ ಚಲಾಯಿಸುತ್ತಿರುವ ಅಶ್ವಿನಿ ಹಾಗೂ ಪ್ರಿಯಾ ಇದಕ್ಕೆ ಜೀವಂತ ಉದಾಹರಣೆ. ಕಳೆದ ಎರಡು ವರ್ಷಗಳಿಂದ ಪ್ರತಿದಿನ ಬೆಳಿಗ್ಗೆ 9 ಗಂಟೆಯಿಂದ ಸಂಜೆ 6 ಗಂಟೆಯವರೆಗೆ ಆಟೋ ಓಡಿಸುತ್ತಿರುವ ಇವರಿಗೆ, ಈ ವೃತ್ತಿ ಕೇವಲ ಜೀವನೋಪಾಯವಲ್ಲ… ಸ್ವಾಭಿಮಾನದ ಬದುಕಿನ ದಾರಿ.
ಮನೆಯಿಂದಲೂ ಉತ್ತಮ ಬೆಂಬಲ ದೊರೆಯುತ್ತಿದೆ ಎನ್ನುವ ಅಶ್ವಿನಿ ಮತ್ತು ಪ್ರಿಯಾ, “ನಮ್ಮ ಬದುಕು ನಮ್ಮ ಹಕ್ಕು. ಅದನ್ನು ಗೌರವದಿಂದ ಮುನ್ನಡೆಸುತ್ತಿದ್ದೇವೆ” ಎಂಬ ಆತ್ಮವಿಶ್ವಾಸದ ಮಾತುಗಳನ್ನಾಡುತ್ತಾರೆ.
ಕೊಡಗಿನ ವಿವಿಧ ಭಾಗಗಳಲ್ಲಿ ಒಟ್ಟು 11 ಮಹಿಳಾ ಆಟೋ ಚಾಲಕಿಯರು ತಮ್ಮ ಬದುಕನ್ನು ಕಟ್ಟಿಕೊಳ್ಳುತ್ತಿದ್ದಾರೆ. ಗೋಣಿಕೊಪ್ಪದಲ್ಲಿ ಇಬ್ಬರು, ಸಿದ್ದಾಪುರ–ನೆಲ್ಯಹುದಿಕೇರಿಯಲ್ಲಿ ಮೂವರು, ಸೋಮವಾರಪೇಟೆ, ಮಡಿಕೇರಿ, ಭಾಗಮಂಡಲ ಹಾಗೂ ಏಳನೇ ಹೊಸಕೋಟೆಯಲ್ಲಿ ತಲಾ ಒಬ್ಬರು ಮಹಿಳೆಯರು ಆಟೋ ಚಾಲಕರಾಗಿ ದುಡಿಯುತ್ತಿದ್ದಾರೆ.
ಇವರಲ್ಲಿ ಸುಜಾತಾ ಅವರದ್ದು ಮತ್ತೊಂದು ಸ್ಫೂರ್ತಿದಾಯಕ ಕಥೆ. ಕಳೆದ 13 ವರ್ಷಗಳಿಂದ ಆಟೋ ಸ್ಟೇರಿಂಗ್ ಹಿಡಿದು ಗೌರವದ ಬದುಕು ನಡೆಸುತ್ತಿರುವ ಅವರು, ಕಷ್ಟಗಳಿಗೆ ಹೆದರದೆ ದುಡಿದು ಬದುಕು ಕಟ್ಟಿಕೊಳ್ಳಬಹುದು ಎಂಬುದನ್ನು ತೋರಿಸಿಕೊಟ್ಟಿದ್ದಾರೆ.
ಪ್ರತಿದಿನ ಬೆಳಗ್ಗೆಯಿಂದ ಸಂಜೆವರೆಗೆ ರಸ್ತೆಯಲ್ಲಿರುವ ಈ ಮಹಿಳೆಯರ ದುಡಿಮೆಯ ಹಿಂದೆ ಹಲವು ಸವಾಲುಗಳಿವೆ. ಸುರಕ್ಷತೆಯ ದೃಷ್ಟಿಯಿಂದ ಮದ್ಯಪಾನ ಮಾಡಿದ ಪ್ರಯಾಣಿಕರ ಬಾಡಿಗೆಗೆ ಹೋಗಲು ಅವರು ಹಿಂದೇಟು ಹಾಕುತ್ತಾರೆ. ಆದರೆ ದೂರದ ಪ್ರಯಾಣ ಎಂದಾಕ್ಷಣ ಹೆದರುವುದಿಲ್ಲ. ಅಗತ್ಯವಿದ್ದರೆ ದೂರದ ಬಾಡಿಗೆಯನ್ನೂ ಆತ್ಮವಿಶ್ವಾಸದಿಂದ ಸ್ವೀಕರಿಸುತ್ತಾರೆ.
ದಿನಕ್ಕೆ ಸುಮಾರು 700ರಿಂದ 1100 ರೂಪಾಯಿವರೆಗೆ ದುಡಿಯುವ ಈ ಮೃದು ಕೈಗಳು, ತಮ್ಮ ಬದುಕನ್ನು ಮಾತ್ರವಲ್ಲ, ತಮ್ಮ ಕುಟುಂಬದ ಭವಿಷ್ಯವನ್ನೂ ಗಟ್ಟಿಯಾಗಿ ಕಟ್ಟಲು ನಿರ್ಧರಿಸಿವೆ.
ಅಚ್ಚರಿಯ ಸಂಗತಿಯೆಂದರೆ, ಮಹಿಳಾ ಆಟೋ ಚಾಲಕಿಯರನ್ನು ಪುರುಷ ಆಟೋ ಚಾಲಕರೂ ಗೌರವದಿಂದ ಕಾಣುತ್ತಿದ್ದಾರೆ. “ಇಲ್ಲಿ ಯಾವುದೇ ತಾರತಮ್ಯವಿಲ್ಲ, ಅವರೊಂದಿಗೆ ನಾವಿದ್ದೇವೆ” ಎನ್ನುವ ಮೂಲಕ ಸಹೋದ್ಯೋಗಿ ಆಟೋ ಚಾಲಕರು ಹಲವು ಸಂದರ್ಭಗಳಲ್ಲಿ ತಮ್ಮ ಮಾನವೀಯತೆಯನ್ನು ತೋರಿಸಿದ್ದಾರೆ.
ಇಂತಹ ಮಹಿಳೆಯರನ್ನು ಕೇವಲ ಪ್ರಯಾಣಿಕರಾಗಿ ನೋಡುವುದಕ್ಕಿಂತ, ತಮ್ಮ ಕಾಲ ಮೇಲೆ ನಿಂತು ಬದುಕು ಕಟ್ಟಿಕೊಳ್ಳುತ್ತಿರುವ ದುಡಿಯುವ ಮಹಿಳೆಯರಾಗಿ ಸಮಾಜ ಗುರುತಿಸಬೇಕಿದೆ. ಆಡಳಿತ ವ್ಯವಸ್ಥೆ ಹಾಗೂ ಜನಪ್ರತಿನಿಧಿಗಳು ಇವರ ಪರಿಶ್ರಮವನ್ನು ಗುರುತಿಸಿ ಅಗತ್ಯ ಸಹಕಾರ ನೀಡಬೇಕಿದೆ. ಮಹಿಳಾ ಆಟೋ ಚಾಲಕಿಯರ ಸುರಕ್ಷತೆಯ ಬಗ್ಗೆಯೂ ಪೊಲೀಸ್ ಇಲಾಖೆ ವಿಶೇಷ ಕಾಳಜಿ ವಹಿಸುವ ಅಗತ್ಯವಿದೆ.
ಒಂದು ಕಾಲದಲ್ಲಿ “ಮಹಿಳೆ ಆಟೋ ಓಡಿಸುತ್ತಾಳೆ” ಎನ್ನುವುದು ಅಚ್ಚರಿಯ ಸುದ್ದಿಯಾಗಿತ್ತು. ಇಂದು ಕೊಡಗಿನ ರಸ್ತೆಗಳಲ್ಲಿ ಅದು ಬದುಕಿನ ವಾಸ್ತವವಾಗಿದೆ. ಕುಟುಂಬದ ಹೊಣೆಗಾರಿಕೆ, ಸಮಾಜದ ದೃಷ್ಟಿ, ರಸ್ತೆಯ ಸವಾಲುಗಳು… ಯಾವುದಕ್ಕೂ ಜಗ್ಗದೆ ಸ್ಟೇರಿಂಗ್ ಹಿಡಿದು ಮುನ್ನಡೆಯುತ್ತಿರುವ ಈ ಮಹಿಳೆಯರು ಹೇಳುತ್ತಿರುವ ಸಂದೇಶ ಒಂದೇ—
“ನಮ್ಮ ಬದುಕು ನಮ್ಮ ಹಕ್ಕು… ದುಡಿದು, ಗೌರವದಿಂದ ಬದುಕುತ್ತೇವೆ.”
ಆಟೋ ಕೇವಲ ವಾಹನವಾಗಿರಬಹುದು.
ಆದರೆ ಇವರ ಕೈಯಲ್ಲಿರುವ ಸ್ಟೇರಿಂಗ್… ಸ್ವಾಭಿಮಾನದ ಬದುಕಿನ ದಿಕ್ಕು ತೋರಿಸುವ ಹಿಡಿತ. ಗೌರವದ ಬದುಕಿಗಾಗಿ ಸ್ಟೇರಿಂಗ್ ಹಿಡಿದ ಆ ಕೈಗಳಿಗೆ… ಒಂದು ಸಲಾಂ